გუდაუთა, 8 სექტემბერი (საქდესი). ღამის სიჩუმეში მშვიდად ეძინა ზღვისპირა ქალაქს გუდაუთას, როცა ქუჩაში გაისმა ქალის ხმა, მიშველეთო. საზარელი სურათი დაინახა გამვლელმა ვ.კარამზიამ, რომელმაც მაშინვე მიირბინა იქ. ცეცხლმოდებული სახლის მეორე სართულის ფანჯრიდან ქალი ევედრებოდა, ბავშვები გადამირჩინეო.
კარამზია სწრაფად შევარდა ალმოდებულ ბინაში, ზედიზედ გამოსტაცა ცეცხლს მატვეევების ბავშვები -9 წლის ვლადიმერი, ორი წლის ელენე და თვენახევრის ოლღა, შემდეგ ქუჩაში გამოიყვანეს გონდაკარგული დედა.